top of page

A Mostviatla Gmoarotssitzung

Ob Billa, Penny oda Logahaus,

bei de Preise kriagst an Graus!

Da Kontostaund is net heha worn

irgndwo miass ma aufaunga zan Sporn.

Do hob i a großortige Idee

mia gengan gratis ins Kabarett!

„Tom und Jerry“ spüns im Rothaus obn

mitn Buagamasta und da Opposition.

Gmoarotssitzung sogt ma a dazua

und zan Lochn gibts jeds Moi gmua.


Da Buagamasta blickt ned stumm,

on dem gaunzn Tisch herum.

De Gmoarad va da ÖVP

de miassn spurn, des wissns owa eh.

De Gmoarad va SPÖ und FPÖ dagegn

de hom net wirklich vü zan Redn.


Owa bei da greßtn Opposition

gibts wos zan Hern und ah zan Schaun.

De bringan Aundrag ein unvazogt

waun a de meistn davon wern vatogt.

Bsundas bei an wird da Burgamasta glei laud,

direkt zan Fiachtn, dass er eahm amoi ane owahaut.

Maunchmoi, won da ane redt, geht da Burgamasta glei ausse aufs Klo

wei wos der zan sogn hot, des waß er jo eh schau sowieso.


Dass da oa des so gelossn auf sich nimmt,

i deng, dass des va da Erziehung kimmt.

Za uns homs oiwei gsogt:

da Gscheitane gibt noch

da Esl foit in Boch.

Drum braucht se jetzt a kana frogn,

warum so oft de Aundan hom des Sogn.


Und waun de in Burgamasta gengan auf de Sockn,

wauns eahm z'laung dauert, daun haut er anfoch auf de Glockn.

Redezeit is um, des soi des haßn,

owa do hot da ane dem aundan sei Redzeit übalassn.

In dem Glaubn, dass er des ollas schau kennt,

is da Buagamasta wieda ausse grennt.

Da hot er desmoi owa wos vasamt,

de Gmoarad hom owa ollas ghert und se dengt, se hom dramt.


30 Joa Europagmoa wa zan Feian gwen,

a großes Voixfest hätts aus dem Aunloss soin gebn.

De Opposition hat den Karas aus Brüssl organisiert,

owa der hot vor de larn Tisch referiert.

Unsa Buagamasta hot aufs Eiloadn va wichtige Leid „vagessn“,

so san a boa Hansln allane do gsessn.

Gaunz vabissn homs vorher nu de Europafahne gsuacht,

stundnlaung, da homs sicha gaunz sche gfluacht.

Se hättn se schau dengt, se hättns valaboriert,

Do hett ma uns nu mehr blamiert!


Owa Leitln, so kaun des do net geh,

im Endeffekt kimmt des sauteia, des Kabarett!


Mia woin do olle des Beste fia de Gmoa, des is fix,

waun mia uns gegnseitig aufreibn, bringt des nix.

Ob Ukrainekriag, Klimawaundl oda Betriebsgebiet umanaund,

de Probleme va heita de lös ma nua mitanaund

Mitanaund und in an onständign Ton,

mia lebn jo schließlich in da Zivilisation!


unbekannter Autor mit guten Absichten :-)

209 Ansichten

コメント


bottom of page